噚日下晝接近5點，69歲姓杜男子喺石澳玩滑翔傘，其間懷疑遇到一陣怪風吹襲，滑翔傘失控被吹向石澳高爾夫球場入面一棵大樹，最後掛咗喺棵樹上面，事主被困，59歲姓周男子見到咁嘅情況幫佢報警。
讀者柯先生都見到當時情況，佢話見到一個滑翔傘衝向高球場，臨撞埋棵大樹之前，事主想轉彎但係唔成功，結果滑翔傘掛咗喺樹上，冇幾耐就有救援人員趕到現場拯救。被困樹上嘅事主最後由消防員救返落嚟，佢冇受傷，拒絕送院。
資料顯示，本港大約有超過300人活躍玩滑翔傘，全港可以玩滑翔傘嘅地點有8個，包括浪茄灣、北潭坳、八仙嶺、馬鞍山、西灣、石澳、南大嶼山郊野公園西部及東部，有固定範圍同埋高度限制。