九龍西直選議員補選，建制派陳凱欣勝工黨李卓人。選後有好多人講嘢，意見多多，包括左丁山在內。如果檢討到尾，泛民主派敗選嘅原因其實就係輸人、輸錢。輸人：民主派搵唔到四十歲左右嘅男或女候選人，還是要搵老李61歲，老氣橫秋，形象輸了一半，泛民要發功找尋新人咯！還有要輸錢，民建聯要捧同路人，要錢有錢，要人有人，據網報「眾新聞」報導，陳凱欣於10月4日正式參選，沒有申報政治聯繫，三度否認代表建制派，到了11月14日，於誓師大會上公開承認自己「屬建設力量，建制派力量」，否定自己在參選日之言論，並且在9月22日已經印刷1500件義工團背心，9月28日參選前六日，已印製逾30萬張傳單及近百個易拉架，已獲得60名建制派人士支持。
陳凱欣選前聲勢浩大，資源充足，遠非泛民可比，當然係因為財富懸殊之故。陳凱欣競選經費從何而來，現在唔知，但如果主要支持者係民建聯（李慧琼、蔣麗芸、鄭泳舜全力為佢助選），民建聯就大把錢啦！上星期民建聯搞籌款晚會（在會展噃，好大陣仗），一幅饒宗頤墨寶拍賣，許榮茂以一千萬元買入，張曉明為儲郵冊題字，又籌得二百二十萬，曾鈺成搞棟篤笑又籌得五百一十萬，表演節目仲搵到三位前局長高永文、譚志源、蘇錦樑化裝表演K-POP，令特首林鄭月娥拍爛手掌……
試問如此豪華場面，泛民如何可以對抗，兩相比較，直情係民建聯朱門酒肉臭，泛民路有凍死骨。
以後泛民參加直選，明知輸錢九條街，冇法子比較，必須盡力在挑選候選人方面放棄年過60歲之老泛民，精挑35-45歲左右既打得又講得嘅溫和派出戰，希望憑藉比例代表制之助，搶番一啲議席。（按：比例代表制係97之前曾鈺成等人堅持要採用嘅，原意係防止民主派贏盡，想不到今天竟成為保衞民主派議席嘅工具，都幾諷刺）。以九龍西為例，今次投票選民約21.6萬人，投票率44.4％，選民總數約48.7萬人，假設2020有50萬選民嘞，九龍西有6個議席，假設投票率等同2016年係58.3％，投票共29萬人，除以6，每一張名單得4萬8千，可肯定當選。但建制派鐵票係11萬左右，理論上只能保住三席，泛民，泛民咪有機可乘囉，正是有選未為輸，泛民有比例代表制保護傘，還可以苦撐！