俄超球隊恩尼些爾（紅衫）上個禮拜六喺主場迎戰艾馬卡特，驟眼睇冇乜特別，但原來呢場波係喺攝氏零下25度嘅西伯利亞舉行。主隊恩尼些爾賽前曾要求將比賽搬到室內球場舉行，雖然俄羅斯足總列明，如果比賽日嘅溫度等於或低過零下15度，球隊係可以拒絕比賽。不過，俄足總上星期一突然推翻將比賽移師室內嘅決定，勒令必須喺戶外進行，兩隊最終踢成1:1。