新地噚日主辦第七屆公益垂直跑，郭炳江囝囝郭基煇（Adam）同郭炳聯囝囝郭基泓（Christopher）兩位新地第三代掌舵人，首度合作一齊跑企業組隊際賽。近年喺公司業務陸續「入局」嘅Adam同Christopher今年連慈善活動都走到最前線，由以往參加82層體驗賽轉戰企業組接力賽，分別負責跑最重要嘅頭尾兩棒，佢哋呢隊最終用15分19秒完成82層，得第6名。
外界一直關注Christopher同Adam嘅關係，競爭嘅心會唔會存在喺隊友之間？不嬲有做開運動嘅佢哋異口同聲話今次最辛苦係精神壓力，唔通真係暗地較勁造成？唔係，佢哋話因為係隊際賽，講合作精神，「唔可以拖累隊友」。呢對堂兄弟合作管理咁大間公司，梗係唔想做對方豬隊友，旗下咁多位員工可以放心啦！
難得兩位新地王國未來主人翁身體力行「運動行善」，難怪今年垂直跑破紀錄吸引1,900人參與，計埋新地額外兩蚊配一蚊嘅捐款，總共籌到600萬元。