上星期六日職煞科，雖然冠軍同埋直接降班球隊早就塵埃落定，不過升降班附加賽同埋亞冠盃參賽席位都仲要爭。結果磐田山葉作客冠軍川崎前鋒，喺補時階段輸烏龍波之下，不幸跌落第16位，要贏附加賽先保得住日職席位，認真慘情。賽前總共有五支球隊仲有降班危機，其中磐田作客川崎有倒戈嘅大久保嘉人先開紀錄，不過83分鐘被逼和。原本只要保住一分都可以護級成功，但到補時階段因為大井健太郎擺烏龍再失一球，最終輸1:2。喺5支球隊同得41分之下，磐田因為得失球最差而跌落第16位，將要同日乙升班附加賽嘅勝方爭一個日職席位。剩低兩個亞冠席位就由廣島三箭同埋鹿島鹿角奪得。
比起煞科戰，更矚目嘅應該係西班牙前鋒韋拿喺神戶勝利船主場出現睇波。呢位喺聽日就37歲嘅西班牙國腳級將繼普多斯基同恩尼斯達之後，正式加盟勝利船。據報韋拿將會同勝利船簽約兩年，年薪3.23億日圓（約2,200萬港元），不過只係普多斯基嘅一半。