三屆世界足球先生、法國球王施丹上季尾公佈唔再教西甲嘅皇家馬德里後就一直放假，佢呢排就應贊助商邀請，去大中華區進行為期六日嘅行程，噚日最後一站就嚟到香港，呢位球王抵港後即刻去咗赤柱四圍遊，下晝先去贊助商喺尖沙嘴嘅旗艦店出席宣傳活動，仲吸引咗幾百球迷到場等佢，包括大台藝人兼忠實球迷、「游生」袁文傑集郵。施丹話雖然家庭比做球員同教練都重要，但就話會繼續教波，但就未有時間表，亦唔限喺邊度教喎。
施丹之前兩次嚟香港，第1次喺2003年，佢嗰陣踢緊皇馬，第2次就係09年嚟為代言嘅手錶做宣傳，今次就係第三次，有球迷仲喺赤柱野生捕獲到佢㖭。
施丹下晝就去咗尖沙嘴出席宣傳活動，我求大俠當然要捧吓場啦，現場大大話話有幾百人喺店門口同圍欄等佢本尊，到施丹現身，球迷梗係即時起哄啦；原先大會冇安排施丹幫球迷簽名，但佢活動後就主動走去門口幫球迷簽名，親民度爆燈。贊助商代表就送咗個小型花牌畀施丹做紀念，施丹都禮尚往來，寫咗「足智多謀」當回禮。
鍾意做老竇多過教練
今次同老婆一齊嚟嘅施丹，受訪時就話為有機會執教皇馬兩季幾、同訓練過咁多位偉大球員感到驕傲，話過程都有遇過困難，但整體係正面同開心嘅，又話自己教波鍾意主攻，不過家陣就繼續放假先，之後先會復出教波，但佢就話未有時間表，亦唔會限制自己下一站去邊度教。
問到佢球員、教練同老竇邊個角色最重要，佢話家庭最重要，所以最鍾意做老竇呢個角色，仲話家庭係成功嘅基本，所以有時間就會返馬賽老家探吓家人。
嘆10號仔變質
近年球壇有唔少變化，好似施丹當年嘅10號仔買少見少，講起都有啲唔開心，仲話家陣嘅10號喺球隊嘅角色改變緊，同佢以前嗰啲集中創造同進攻嘅10號仔有好大分別。據聞施丹今日仲會喺香港，但就純粹私人性質，想見球王？睇你好唔好彩喇！