禮拜五嘅澳職獨腳戲，阿德萊德聯憑中場賀路雲轟入兩粒，主場以2:1擊敗有軒歷基安達迪建功嘅布里斯班獅吼，近兩場聯賽全勝！
上輪擊破威靈頓鳳凰嘅阿聯一開賽就狂攻，但到臨完半場先搵到第一個入波，43分鐘中場奇治葛雲左路傳中，賀路雲輕鬆撞入，半場領先1:0。易邊後阿聯再擴大優勢，賴恩基圖49分鐘右路傳中畀獅吼門將占美楊格閂出，賀路雲門前補射得手，領先至2:0。
兩軍各領一紅
喺67分鐘戰情出現變化，後備入替嘅獅吼中場雲素賀爾斯右路快放，力壓阿聯守衞送出地波傳中，巴西前鋒軒歷基安達迪瞓身將皮球鏟入網，追至較接近嘅1:2比數。
去到78分鐘阿德萊德聯打少個，已經攞咗一面黃牌嘅中堅泰萊列根從後推跌雲素賀爾斯，俾球證兩黃一紅趕出場。之後戰況越來越緊湊，到咗下半場補時一分鐘，獅吼都打少個，史提芬莫克兩黃一紅被趕出場，但對戰情冇影響，阿聯都係贏2:1。