左丁山每年去拜車公廟，有幾年見到大批基層長者坐旅遊巴士到達，巴士一架接一架，多到數唔晒，令車公廟路交通擠塞，睇多幾眼，就見到每架巴士有標記，明白係「蛇齋糭餅」一類活動，無法子唔佩服中聯辦做基層工作之努力，在幕後可以發動咁多唔同社團、組織拿票，呢股力量平時養好備用，一到直選投票就認真有食力。
十一月二十五日之九龍西補選，建制派由民建聯工聯會出面全力攙扶一位陳凱欣上轎，果然得到106,457選票，工黨李卓人得93,047票，馮檢基得12,509票，伍迪希得1650票，曾麗文得1307票。兩位前民主派盟友老李及老馮加埋共得105,556票，還是要輸901票，唯有認命，即使老馮唔係明知輸梗強行參選，佢啲票送晒畀老李，都係要輸；唔怪得毛孟靜話民主派受重創，出動老人家李柱銘，少壯派區諾軒、羅冠聰，盛年精英楊岳橋到處為老李拉票，仍然無補於事。陳凱欣則證明建制派在九龍西有鐵票，上次三月補選，鄭泳舜有107,479票，今次陳凱欣有十萬零六千，較上次相差1022票，幾可見呢個建制派票源有保證，而上次姚松炎有105,060票，民主派同樣有一個鐵底係十萬五千票，到咗2020年選舉用比例代表制，投票率必定要提高，泛民才有希望追回失地。
今次投票率得44.4%，但如何發動刺激另外27萬選民到票站，係泛民一個大難題，年青人普遍支持泛民，但年青人或有幾百個理由唔去投票，靠唔住，長者則是建制派可以掌握嘅皇牌，中年人呢？必須指出，左丁山選前唔講，依家不吐不快，如李卓人一類候選人，全無魅力，基層中年人可能係工聯會會員，反對職工盟，白領中年人則對李卓人充滿左膠意識之經濟理念，難以接受，老闆更唔在講，泛民要選出一啲較溫和、有專業背景嘅新人既講民主自由原則，又講合乎香港人經濟理念嘅候選人先至有選舉勝利希望。如左丁山呢類人，對陳凱欣讀浸大傳理系，出身記者，而竟然為了上位而發表跡近贊同踐踏新聞自由、言論自由嘅言論，十分反感。但同時亦對李卓人所代表之赤色經濟思維，難以接受。泛民有無辦法搵到一批如楊岳橋呢類人出戰2020呢，泛民元老應該認真籌謀！