英超倫敦雙雄阿仙奴同車路士禮拜四齊齊出戰歐霸分組賽,由於佢哋賽前已經喺E同L組提前拎咗出線資格,結果喺盡出年輕球員下,槍手遠征禾斯克拉贏3:0,車仔主場就以4:0炒PAOK,真係談笑用兵!
史密夫槍手大發現
禾斯克拉嘅主場本身位於烏克蘭東部嘅波爾塔瓦,但因為距離烏克蘭東部戰區比較近,加上國內實施戒嚴,所以場波要移師首都基輔踢。身處E組嘅阿仙奴賽前已經有10分,肯定可以出線歐霸盃32強,所以今次作客烏克蘭嘅禾斯克拉就派出大量後備兵,由尼基迪亞、古安杜斯同史密夫路維等小將擔正,但一樣完全控制戰局,更加喺上半場就攻入全部三個入球。11分鐘,尼迪基亞射門被閂出,史密夫路維就把握機會轟入空門,兵工廠領先1:0。到27分鐘,艾朗藍斯喺禁區被禾斯克拉後衞比度達掃跌,球證直指12碼,藍斯親自操刀得手領先至2:0。
完半場前四分鐘,阿仙奴小將韋爾洛克引球推進一程後,喺大禁區頂射遠柱得手,幫球隊收穫一場大勝,兼奠定首名晉級。至於同組嘅士砵亭作客以6:1大炒卡拉巴克,亦都肯定次名晉身32強。
藍戰士小獅破紀錄
年僅18歲嘅史密夫路維,雖然未試過喺聯賽露面,但目前已經喺歐霸盃入咗兩球,主帥艾馬利大讚佢係年輕球員嘅典範:「佢展示咗信心,擔起咗責任,呢90分鐘嘅表現實在太好。佢係其他年輕球員嘅學習對象。」
同日L組賽事,車路士主場輕鬆以4:0解決10人應戰嘅PAOK,5場分組賽全勝得15分,同阿仙奴一樣以首名晉級。今仗接戰七分鐘PAOK就打少個,中堅卡查列迪踢跌單刀埋門嘅基奧特直接領紅。結果人多打人少嘅車路士,有今季後備多過正選嘅基奧特梅開二度,加上赫臣奧杜爾同艾華路莫拉達各入一粒,以4:0大勝一場。值得一提嘅係,今場幫車仔射入第三球嘅千禧小將赫臣奧杜爾,以18歲又22日成為歐霸盃史上(自09/10球季賽事改名起計)幫英格蘭球隊取得入球嘅最年輕球員。賽後沙利亦都大讚有兩個助攻嘅法比加斯,睇嚟呢名西班牙中場留隊有望。