現年38歲嘅愛爾蘭著名射手羅比堅尼，日前被愛爾蘭國家隊委任為新帥麥卡菲嘅助教，至周三終宣佈正式掛靴，結束21年球員生涯。羅比堅尼發表聲明話自己走遍世界各地包括曾喺國際米蘭、列斯聯、熱刺、洛杉磯銀河等效力，遠遠超越咗一個喺都柏林長大嘅足球男孩心中嘅願望。羅比堅尼認為喺熱刺效力並成為隊長嘅日子，係佢足球生涯最成功嘅時刻，同時又對為愛爾蘭上陣感到榮幸，感謝球迷、所有隊友、教練、經理人及家人，又話自己即將接受新挑戰，同麥卡菲一同帶領國家隊，希望將自己嘅經驗，為愛爾蘭足球嘅美好未來作出貢獻。
至於細羅比堅尼兩年，效力紐約城嘅36歲西班牙射手韋拿，周三亦宣佈自己喺呢間美職球會嘅生涯將告結束，12月合約完結後就會離開，但就未計劃就此掛靴。