馬路如虎口，揸車同過馬路都要特別留神，因為有乜事老人家真係走唔切，更何況火炭呢位婆婆仲係坐住輪椅㖭！
交警跪地安慰
話說噚日（29日）上晝11點幾，讀者蔡先生揸車去到火炭御龍山，喺上落客位等緊朋友時，突然聽到「啪」一聲巨響，落車八吓，就見到一位婆婆被撞到瞓咗喺的士前面嘅馬路，一位外傭姐姐跪咗喺婆婆身邊，旁邊有一輛相信屬於婆婆嘅輪椅。屋苑保安員即刻出嚟了解，交通警亦都好快到場，並且跪地安慰婆婆，佢當時清醒。
蔡先生話，現場係的士站，經常都有的士由樂景街轉入嚟，不過車速都好慢。今次好彩只係撞到輪椅，不過婆婆跌落地之後，可能撞到個頭，覺得頭暈暈，救護車將佢送去醫院檢查。警方回應指，噚日早上11時半，姓劉司機（56歲）駕駛的士沿樂景街行駛，當右轉入御龍山時，收掣不及將一名坐輪椅的老婦撞倒，當時老婦由女傭推住過馬路。傷者姓董81歲，由救護員送往威院治理。