民政事務局前局長何志平涉賄非洲官員，有關案件喺美國紐約法院審緊。有立法會議員同八方講，70位議員噚日收到聲稱由「郭錫強醫生」寄嚟嘅何志平著作《醫言香江》（圖），有議員直言好驚嚇，唔知有心人特登將受審中嘅肥平大作送去立法會，係唔係意有所指，提醒議員唔好行差踏錯。
八方聽聞，70位立法會議員都收到由聲稱「郭錫強醫生」寄去立法會嘅《醫言香江》，唔少議員話唔識「郭錫強醫生」，有議員就估，係唔係因為肥平正受審，要提醒議員唔好行差踏錯？亦都有人笑稱，肥平日後應該無暇再寫書，呢本可能係佢最後著作，要好好留念咁話。八方嘗試搵過郭醫生求證，不過姑娘話佢做緊手術，唔方便回覆。呢本書每本定價116元，八方計過，若然「郭醫生」真係每個議員派一本，都要成8,000幾蚊。