為咗《男兒當入樽》，大家可以去到幾盡？《蘋果日報》噚日附送櫻木花道海報，有人通宵守候、有人一次過掃幾份，有人獻出第一次買。中環報檔檔主才女話噚日朝早《蘋果》就售罄，佢之後多攞一批都迅速賣清，隨後不斷有市民查詢仲有冇，估計區內《蘋果》被搶購一空。facebook更有唔少人po咗攞住海報嘅勝利照，全城勾起《入樽》回憶。
粉絲唔瞓 買咗先安樂
自小愛《男兒當入樽》、現年35歲喺觀塘開設工作室嘅Karman一直收藏相關海報同埋精品，佢噚日喺便利店守候至清晨5點，《蘋果》一到即時搶購四份，自言徹夜未眠，買咗先安樂。
Karman話《入樽》海報比想像中大張，紙質好靚，一次過買四份，兩張自己珍藏，兩張送給朋友，希望《蘋果》每月都送海報。蔡小姐亦因為海報而幫襯買《蘋果》，佢坦言冇買報紙習慣，但好鍾意張海報，希望日後《蘋果》送海報時可以用雜誌紙印製，方便讀者收藏。
「神作面前，不問政治」，民建聯立法會議員劉國勳自爆因為送海報，人生第一次買《蘋果》，仲一次過掃三份，一份貼咗喺立法會辦公室、一份攞返屋企貼，另一份貼喺粉嶺辦事處或者珍藏。
處男下海，無非因為劉國勳自細係《入樽》迷，唔少經典畫面例如三井突破體力極限得出自己係「永不放棄的男人」呢一幕令佢印象深刻，希望《蘋果》之後可以出三井甚至湘北5人組海報，「等我可以集郵集晒全隊」！
李八方