世界上有不知多少個排名榜，例如大學排名榜、大學學科排名榜、經濟自由排名榜、宜居城市排名榜、學生PISA排名榜、機場排名榜、航空公司安全排名榜等等。香港小小一個城市，經常在不同排名榜上名列第一、前五名、前十名、前二十名等，力壓歐美不少文明先進國家，可算威水，香港人有面子。但香港有人好奇，見到香港排名前列，會冇乜反應，一見香港排名下跌，就好似有大危機發生，惶恐之極，呢種唔知係乜心態。老套啲講句，呢啲咪係將「排名榜政治化」囉！尊貴的陳克勤議員唔知會唔會鬧人將事件政治化呢？相信唔會嘞！陳議員一定唔出聲，因為將排名榜政治化者，就係支持佢嘅愛國報紙。
瑞士IMD（洛桑管理學院）每年不知發表多少個排名榜，最新一個就係IMD World Talent Ranking「2018世界人才排名」，瑞士第1，加拿大第6，美國第12，新加坡第13（不變），香港第18（跌六位），英國第23，台灣第27，日本第29。呢個排行榜是否可信呢？無論用甚麼方法／準則去排名，美國人才會少得過加拿大？香港會勝過日本？新加坡會拋離英國？簡直攞嚟講得啖笑。世界尖端科技人才以三藩市灣區最多，領導世界，話丹麥（第2名），人才勝過矽谷，簡直開玩笑，而且「厲害了中國」不列入前30名，好傷害中國人民感情啫，中國科技工業界員工，多過丹麥全國人口呀！
正因為咁，愛國報紙拿人才排名榜大做文章──「反對派拉布拉走港人才，政界教育界斥無視經濟發展需求」；「政爭不斷，優才捨港取星洲」；「嫌港政客噪聲多，港女居滬創事業」，將香港人才排名跌六位之事，上綱上線，扯到泛民反對派，想像力認真厲害！愛國才女潘麗瓊在《明報》專欄寫：「為什麼香港輸給新加坡？」提出三大理由：（一）李光耀把英文定為第一語言，新加坡人英語最好，啱噃，請潘小姐問吓董建華香港點解要推行母語教育？（二）新加坡優惠外國公司，積極填海造地，令居者有其屋，外國人租屋租金較便宜。林鄭啱聽喎，林鄭一聲話填海1700公頃，香港樓價便開始下跌，最好一路跌落去。（三）政治，畫龍點睛嘞，反對派不斷搞政治風暴，拖延香港進步。
因一個人才排名榜，反對派又孭晒上身，但2012年至2017年之香港樓價狂升六成，令外國人才不輕易來港，又關邊個事呢？潘小姐係梁振英粉絲，唔該得閒問吓。