早前美國國會有報告建議考慮取消香港獨立關稅區地位，唔少商界巧驚驚，紡織界甚至組團訪美痛陳利害，點知前律政司司長兼基本法委員會前副主任梁愛詩冇有怕！信奉「厲害了，我的國」嘅詩姐接受劉慧卿網台訪問時強調，世貿已列明中、港屬不同關稅區，根本係美國違約，批評美方說法係利用香港作為對付中央嘅棋子；卿姐追問係咪擔心美國全面增加中國關稅？詩姐話此舉固然打擊中國經濟，但美國多年嚟都用中國嘅平價貨，所以「大家都唔會有好處」，更重要係：「中國人慣咗捱㖭呀！」
幫「細路女」陳凱欣助選
傾到香港外國記者會前副主席馬凱不能入境時，詩姐斥責馬凱刻意入境係挑釁，認為「睇佢做嘅嘢好清楚係咁（挑釁）吖嘛」，強調馬凱「唔係有必然嘅權力進入香港」喎。
至於佢早前為建制派陳凱欣助選，詩姐笑言自己從未試過拉票，今次係因為陳透過短訊尋求佢支持，佢又覺得應該鼓勵一下「細路女」所以答應，卿姐即詫異反問陳凱欣仲算「細路女」？就嚟80歲嘅詩姐話呀：「對我嚟講係細路女，我呢啲阿婆嚟㗎喇！」