以往多數坐定定開會投票嘅建制派，噚日竟然作反！工務小組噚日審議有機資源回收中心第二期嘅工程撥款，涉款24.5億元，多位議員大鬧政府書面回應提問太慢，上兩星期嘅提問前日下午5點先有答案，議員完全睇唔切，張宇人更大鬧此做法「不能接受」，發言14次表達不滿，更加提出中止議案，搞到在席嘅環境局副局長謝展寰好無奈，最後議案喺自由黨同民主派聯手下以12票贊成、4票反對下通過，項目要重新排隊上小組，難怪環境局局長黃錦星出席立法會時全程面燶。
「拉布之星」張宇人事後指，不滿政府太遲交文件而提中止，直言唔會「縱容政府部門玩遊戲」，又鬧官員答得差，一直迴避。被問到係咪拉布？佢話環境局要求立法會批錢，但無法解答議員問題，「今日問完都係答唔到，不幸地呢個部門都係拉布」，公民黨郭家麒事後封張為「十四叔」。