【黑鏡線索】
朋友黃雅麗喺專欄，提到「最近一年半載，創業圈子裏朋友們聚首的主要話題，並不是甚麼最新的人工智能或區塊鏈技術，而是去留問題」。然後指出，呢個現象，矽谷近年都有發生，好多年輕人搬離開長大嘅三藩市灣區，去其他城市生活。
越來越多土生土長嘅人離開，呢一點，行為上，香港同矽谷係好似。但離開嘅原因，就唔係咁似。矽谷嘅例子，離開嘅係科技行業以外嘅人，離開嘅原因，經濟問題佔好重。近幾年，更多嘅科技新貴同冒險人，從各地湧入去，谷高咗物價，同一時間，產業單一化傾斜於科技業，令當地非科技人越嚟越難搵到足以應付物價嘅工作。
中型科技公司 實驗遙距返工
離開矽谷，係期望喺第二度搵到經濟立足點。香港呢？如果係錢嘅問題，點解近一兩年忽然多咗咁多人諗住走？唔通2007年樓價唔高？當然比而家低好多，但都唔會形容為affordable啩。唔通2007年產業冇咁單一，我估，金融地產以外某啲產業，例如programming，而家比十年前更加吃香。
而諗住走或走咗嘅人，以我所知，好多係喺香港搵到食嘅，例如老闆。明日大愚出台之後，有個連一向冇諗過移民嘅中型科技公司老闆行家，都開始計劃。呢批人去第二度嘅話，反而唔容易搵得返而家嘅收入同生活質素。好友兩年前開始鋪路出走，為咗保持走後收入，逐步將公司變成同事遙距返工，終於嚟緊十二月會全家出國住一國月，如果實驗成功，公司運作正常，即隨時安心㩒掣。
IT打工嘅，條數仲容易計。一來，好多國家當IT係渴市專業，歡迎專才搬過去滿足吓當地需求，唔少人而家後悔點解當年冇攞番個IT degree。二來，programming用嘅語言同技術，放諸四海皆準，唔會水土不服。要搵得返而家嘅生活水平，比起其他大部份行業容易。
矽谷人問自己，我夠錢留低嗎？而香港人就問自己，我夠錢離開嗎？好明顯，兩個係唔同，甚至係極端相反嘅例子。錢嘅考慮，出走矽谷嚟講係驅動力，出走香港嚟講卻係阻力。有理由相信，如果唔係出走要考慮夠唔夠錢，更多人晨早坐言起行。
香港多咗50年自由 應當感恩
走嘅原因，大家都明。殖民秩序有高低之分，呢邊廂，香港從人類管理技術最高嘅英國，輸入秩序150年。嗰邊廂，滿人撤出中原後嘅秩序真空，乘虛而入咗感染咗蘇聯嘅列寧病毒秩序，一高一低差唔多100年，中間嘅差距大到連比較都係唔公平，根本冇幻想嘅餘地。
同行朋友阿Q啲諗，其實二戰時加簽嘅中英新約，收番張愛玲長大嘅上海自由區，順便包埋香港，只係一念之差。香港比上海自由區存在多50年，之後再加多十年剩餘秩序補埋時，呢60年，掉返轉睇算係執到嘅，而家先兼併入大灣區，應當感恩。
撰文：宋漢生