勝出九西立法會補選嘅「陳健康」陳凱欣今日就會喺立法會大會上宣誓，正式做議員。佢噚日就去到立法會綵排宣誓同參加議會工作坊，兼「睇位」揀新辦事處。
座位 辦事處 同民記一家親
據知，陳凱欣本身獲秘書處安排坐喺熱血公民鄭松泰身邊、原本屬青年新政梁頌恆被DQ前嘅位置，不過阿欣可能唔習慣身邊冇個建制派「傍住」，喺建制派班長廖長江協調下，陳凱欣順利同鄭松泰調位。調位後隔籬將會係之前都有份助選嘅馬逢國，前面就會係建規界議員謝偉銓，正式「歸位」做建制一員。
至於辦事處方面，適逢民建聯主席李慧琼噚日開口歡迎阿欣加入，阿欣亦屬意喺民建聯所在嘅六樓辦公，噚日二話不說就衝上六樓睇位。但目前六樓嘅吉房俾立法會秘書處職員用緊，所以佢暫時要用住前議員長毛梁國雄嘅1019室，估計要聖誕之後先調返去六樓，可以同民記閂埋房門一家親喇。
李八方