噚日朝早10點半，西環邨北苑臺一個住宅單位突然起火冒煙，火勢非常猛烈，濃煙捲上半空。唔少街坊即刻報警同影低當時情況擺上網，大廈保安員發現有單位起火亦都即時報警，警方接獲多個報案。警方及消防員趕到現場，疏散咗大約40名居民。由於單位冇人，消防爆門救火，事件中冇人受傷。
消防員出動兩條喉同兩隊煙帽隊救火，大約23分鐘將火救熄，單位嚴重焚毀。火種救熄後，消防員喺單位入面調查，將屋入面嘅傢俬雜物搬晒出走廊，有啲電器燒到熔晒。不過，最矚目相信係一堆燒毀嘅中草藥，消防員要用水盆盛住逐批搬出走廊，數量可以堆成一個小山丘，顯示住戶喺單位入面存放咗大批中草藥。
香火未熄 戶主外出
單位門口有地主，屋入面亦有神枱，神枱上面有好多尊神像，小記驟眼望入去黑漆漆嘅單位，感覺好似滿天神佛咁。消防員初步調查，起火原因估計同拜神有關。警方事後聯絡到戶主32歲姓劉嘅囝囝返現場了解情況，初步相信係戶主拜神之後離開屋企，其間香火燒着咗其他雜物，火勢一發不可收拾，波及全屋，火警冇可疑。
西環邨屬於房署嘅公屋，1958年入伙，足足一個甲子，有大約600個單位，超過2,000個居民。為咗提高巿民嘅防火意識、保障家居安全，房委會一直都支持喺屋邨推動由消防處舉辦嘅「消防安全大使計劃」，向居民提供基本防火訓練同埋推廣消防安全訊息。參加者須修讀為期一日嘅消防安全大使課程，或者一日半嘅消防安全大使導師課程，完成筆試同合格人士就會獲委任為消防安全大使或者大使導師。睇嚟巿民應該留意吓相關資訊，齊齊保護家園。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。