與鄭大班、陶傑及KT在PP（太古廣場）天一飲午茶，有陶傑在，議論滔滔，一時大爆內幕，不宜見報，一時口沫橫飛，大罵左膠，到三點仲未捨得走，左丁山望吓電話手機，話要鬆人，大班講：「走乜噃，我哋個個好得閒啫。」本來係嘅，但是日星期三有夜馬跑，左丁山就連邊隻馬都未清楚，都要返屋企讀吓馬經先啦。（按：因準備不足，當晚輸到懵咗。）記得1983-1989年間，應葉潔馨之邀，鄭大班、KT、林旭華與左丁山四人逢星期日早上在商業一台主持一個清談節目，四個人事前全無準備，開咪前先至問：「今日講乜嘢呀？」但一開咪就爭住講，月旦時事絕無冷場，現在回想起來，當年在商台做節目十分好玩，唔係話認叻，三十年後，好似仍然未見到有一個同樣嘅節目出現。
返到中環，匆忙執好東西，走去停車場攞車，碰上大道中大塞車，手機響起，乃是劉迺強逝世之要聞簡報，於是嘆一聲，又一位知名同輩走咗嘞！講政治，劉迺強乃鄭大班之對頭人，水火不容。左丁山讀書時代已認識劉迺強，好似係1968-1969年間。左丁山代表新亞學生會，劉迺強代表港大學生會，出席學聯論壇嘅研討會，因而認識，當年之討論主題就係「學生應否參加政治」，今日睇當然係天真可笑，當年就辯論得面紅耳熱。
生涯規劃冇法子預知大家畢業後走向何方，左丁山後來去咗泰國讀碩士，之後在美資銀行做事，與「出口信用保險局」ECIC偶有聯絡，點知竟會重遇在ECIC工作之劉迺強，那時候大家好好傾，後來劉迺強辦商貿雜誌，找左丁山寫稿，劉迺強又辭職從商，始終係理論多過實際，唔見得佢有邊樣創業有大成就！想不到佢後來對政治有興趣，與李永達、文世昌等人創辦匯點，從此與左丁山越行越遠，再無聯絡，至於佢如何有人賞識，一路至到爬升做基本法委員會委員一事，我哋梗係一無所知啦。
一日之內先同鄭大班講拜拜，祝願佢回歸溫哥華生活愉快，跟住又知道劉迺強久病逝世嘅消息，回想三個星期前與港大吳錦祥醫生重逢，驚覺我哋呢一輩已開始騎馬走向夕陽（riding off into the sunset），追唔上時代就唔好阻住地球轉咯！