警隊一哥讓子彈飛，之後急急表忠，對開槍射擊裝修工人致其半身癱瘓的女警俾讚：自豪！引以為榮！Sorry盧sir，呢兩個字眼唔係呢種場合用嘅，無病都知！個女警唔係一槍癱瘓IS恐怖份子，唔係手刃殺人如麻的黑幫大盜，在深水埗站身懷一把鎅刀唔係去剪禮頓鋼筋而係去開工的普通市民，只消一個姓朱那種程度的警司，動用他手臂的延伸，向鎅刀持份者頸後一扑，不就自豪地消滅了襲警的威脅於萌芽狀態了嗎？
市民想了解案情，警方卻無開誠布公，只係一面倒未審先讚。保安局傷口再灑鹽，認為爭取知情權的傷者家屬是訴諸輿論壓力。鎅刀襲警，令人重溫經典的「以胸襲警」大笑話！女人胸器的殺傷性，今日由鎅刀取代，從泛民陣營跳車後身藏鎅刀的西環後備閹人（老馮老鄭老黃etc），今後鎅票時注意好，刀仔唔係屠龍刀，縱有西環認證，擋得住警隊自豪的子彈嗎？存疑。
立志要做永續的鎅票機，又懶醒以為就算挨了女警子彈依然有辦法坐住輪椅繼續鎅的諸君，今天趁個腦未殘得晒，會不會有醒悟的頃刻，意識到，轉錯線兼嘟多咗的代價？到站了，深水埗因你閂閘，好走。