噚日朝11點左右，東區走廊向柴灣方向近太古城發生交通意外，涉及兩部的士同一部載廢紙嘅中型貨車。其中一部的士成個車頭插咗入貨車車尾，的士司機一度被困，最後發現冇畀嘢夾住，清醒送院。
讀者黃先生當時揸車經過，見到左二線有架的士撞咗落貨車度，的士車頭插咗入貨車車尾，貨車前仲有另一架的士同客貨車，但就唔清楚前面有冇撞到，剩係見到撞落貨車架的士個司機成面血，但係仲醒嘅。其間有其他駕駛人士落車，嘗試幫手打開的士門拯救司機，但係打唔開。
現場消息話，停喺貨車前面嘅的士，入面嘅乘客亦都受輕傷。警員接報到場調查，話當時64歲姓李司機揸的士沿東區走廊左二線行車，58歲姓郭男子揸貨車行左三線，去到燈柱位懷疑貨車切線去左二線嗰陣撞到李嘅的士，而呢個時候，56歲姓袁嘅男子亦都揸的士嚟到，煞唔切車撞落貨車。袁嘅的士車頭撞爛晒，路邊一地碎片，司機個頭撞傷咗同流鼻血，而姓李的士司機覺得頭暈，兩人一齊送院。