得到成個國家機器同建制派支持嘅陳凱欣贏咗九西補選，成個建制陣營梗開心，咁特首林鄭月娥又點睇？佢噚日主持行政會議前見記者，被問到建制派再次喺九龍西補選勝出，𠵱家社會氣氛係咪有利政府推出基本法23條立法同有爭議性政策？
「對施政冇乜影響」
林鄭最初答得好官腔，無論立會定係區議會選舉，政府最重視有一個公平、公正、誠實選舉，又話留意到選管會主席馮驊認為今次補選安排做到「公平、公正、誠實」，之後林鄭忍唔住笑住講，立法會每次選舉都出現政治板塊改變，「對我嘅施政呢，就冇乜大嘅……哈，影響」，又話自佢上任以來都非常重視同立會合作，成日去立會回應各黨派議員對於特區施政嘅意見，佢會本住呢種管治風格繼續同所有立會議員合作。雖然林鄭冇評論陳凱欣當選，但見佢講講吓忍唔住笑，應該估到佢有幾開心。
李八方