民主黨本周日改選中央委員會及紀律委員會噚日截止報名，主席胡志偉相信會爭取連任，今次改選焦點查實落在前主席劉慧卿身上，因為卿姐決定出山，參選紀委會。係愛定係責任？係大局呀，佢話個黨發生唔少風波，多位黨友希望更多資深成員參與紀委，處理大局，所以參選，「最緊要有黨紀」。
夠資深可壓場
紀委即將要處理嘅包括許智𥧌涉搶去政府狗仔隊手機事件，卿姐當時曾經高調批評許應辭任議員；卿姐回應時話，佢所指嘅風波係早前已發生嘅事、唔係預計民主黨將會發生嘅事，又話屆時會按既定規則處理許智𥧌事件，「有規矩㗎嘛」。有民主黨員講笑話紀委角色如同豬頭骨，加入嘅人好多時都係「選唔到中委咪紀委」，但自從處理過黃成智事件後，佢哋發現紀委涉及唔少技術問題，亦都茲事體大，需要資深成員坐鎮，形容「阿姐（劉）出嚟維持黨紀都好正常。」
中委會方面，胡志偉同羅健熙爭取連任正、副主席，另一副主席李永成已向胡志偉表達唔再選副主席意願，亦唔會參選中委會，李永成話，希望專注選區工作喎。作為民主派第一大黨，梗係唔愁冇人補位，曾經擔任副主席嘅現任立法會議員尹兆堅已經報名再戰副主席，佢話自己一直有幫手黨務，唔擔心搞唔掂兩邊工作，但負責內務定外務就要有結果後再傾。
李八方