其實冇乜知名度嘅政治素人參選，都咪話冇貢獻，至少都對庫房有進貢。好似今次九西補選嘅「劏房阿哥」伍廸希同曾麗文，前者由服飾到拉票工程奇招百出，最終獲1,650票，得票率為0.8%；後者從未出過美孚以外拉票，獨沽一區攞到1,307票，得票為0.6%。根據規定，參選人得票若唔夠有效票嘅3%，會被沒收5萬蚊選舉按金，換言之庫房多咗10萬蚊。而被視為𠝹票者嘅馮檢基獲12,509票，得票率為5.8%，總算平安袋返5萬蚊。
而2016年立法會換屆選舉起，候選人每票所獲資助額由12蚊增至14蚊，攞到106,457票嘅陳凱欣料獲149萬資助，李卓人就攞到130萬，馮檢基都有17.5萬資助㗎。