荃灣大河道不嬲都人山人海，周六假日情況更甚。前晚星期六至少有兩個人佔據附近兩個相隔百幾米嘅位置，喺街頭賣藝，吸引過百途人圍觀。唔通旺角西洋菜南街殺街之後，促使街頭藝人遍地開花？不過，街坊徐先生經過大河道地皇廣場對開安榮街，見到個青年喺度表演雜耍，佢就戥觀眾牙煙，事關啲觀眾圍成圓圈，最外圍嘅觀眾企喺近大河道交通燈位前面，差啲逼出馬路，亦都令行人路收窄到唔夠兩呎闊，其他行人幾乎冇路行。
徐先生話對上一個星期六已經係咁，佢擔心觀眾或行人逼到行出馬路分分鐘有危險，於是佢就報警。當時報案室警員話喺徐先生報警前10分鐘，已經有巿民舉報同類事件，派咗警員去現場了解。但係徐先生喺現場等咗10分鐘都唔見有警察，覺得警方有必要即時到場控制人群，於是第二次報警，對方都係話已派咗人到場。
警帶走14歲男童
除咗徐先生，當時都有其他途人不滿，鬧表演嘅青年阻路，青年亦都有呼籲圍觀者圍埋啲，唔好企近馬路。雜耍青年做完兩場表演，仲獲巿民打賞，但喺徐先生停留42分鐘都唔見有警察，佢好質疑警方嘅辦事效率，之後仲打埋去投訴警察課投訴㖭。佢希望警方關注上址街頭表演阻街嘅問題，加強巡邏。
警方發言人回覆，上星期六晚約7點半收到市民報案指，荃灣大河道一帶有市民阻街，於是派員到場，其間警察首先喺距離安榮街大約130米外嘅荃興徑，發現一個32歲外籍男人喺街頭表演，於是口頭警告佢，對方之後離開。之後，警察又喺安榮街發現一個14歲男童喺度表演，上前調查發現佢冇帶身份證，口頭警告佢之外，仲帶佢返差館協助調查。事後警方聯絡男童媽咪，帶返佢張身份證去差館證明佢身份就放咗佢。
警方仲話如果當區警察手頭上處理緊其他更緊急嘅案，有機會要做完先過去處理阻街案。附近店舖老闆就話，嗰晚大約8點半，即係徐先生走咗之後，見到有警察到場將表演嘅青年拉埋一邊問話，之後帶咗佢返差館。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。