禮賓府開放日撞正九西補選，但似乎唔係因為要去投票而人流減，可能因為天雨所致，朝早只有約100名市民同遊客輪候入內，而市民進場前，一如過往要接受例行保安檢查。家住觀塘、朝早7點半已經到場輪候嘅吳先生話，1997年前曾到過港督府，呢日再嚟參觀回歸後嘅禮賓府，睇吓當中嘅改變。而禮賓府特別增設印章畀市民蓋印留念，吳先生帶咗已過期嘅舊式回鄉證，喺空白頁加上蓋印。
禮賓府一年開放兩次，噚日冇春天嘅杜鵑，只有紅紅聖誕花供市民欣賞，唔少市民喺放置聖誕花嘅長長石階拍照留念。
而禮賓府女主人、特首林鄭月娥中午返回禮賓府時，落車同參觀市民及遊客握手，又同小朋友合照。隨後佢冒雨去到花園欣賞英華小學學生演奏；有記者問佢有九西補選事宜，佢只係叫大家去投票。