九西補選決戰日，除咗候選人忙，助選團一樣唔得閒，因為地區嘅街站，就係要靠呢啲熱心義工幫忙叫陣。教育界代表葉建源噚日朝喺美孚拉票期間，就遇到奇人奇事兼奇遮！話說當時有位先生，攞住一把黃傘搵佢同其他民主派助選團成員簽名，講真吖，黃傘有乜咁奇？傘運嘅象徵吖，但奇就奇在，呢把黃傘有已故支聯會主席司徒華嘅簽名。
咦，華叔明明2011年告別大家，而傘運2014年先發生……哦，原來係因為呢位先生，好有先見之明，早於佔中前，已經獨具慧眼用呢把黃遮收集民主派人士簽名，其中李柱銘簽名下標註咗2012年。
葉建源相信，呢個應該係華叔唯一一個喺黃傘上嘅簽名，何其珍貴！其他人包括前教育界代表張文光，之後亦有喺黃傘上簽名。