人算不如天算，估唔到11.25投票日，竟然落大雨兼轉涼，諗落喺屋企瞓覺打邊爐，都好過凍冰冰出街投票啦！就係呢種心態嘞，搞到無論建制同民主派陣營，都急如熱窩上嘅螞蟻，紛紛喺傍晚積極動員支持者投票。李卓人團隊製作風雨圖之際，建制派都喺facebook積極動員，皆因呢，如果陳凱欣敗選，建制派一定被中聯辦怪責助選不力，所以一票不能少。工聯會港島區立法會議議員郭偉強唔止跨區助選，仲喺fb助攻。咦，竟然叫人票投「#3號 #陳凱欣」，唔通佢係無間道？
發現出錯速改fb post
郭偉强噚日下午曾喺fb貼相，圖文並茂證明自己有助選；出得嚟行，當然知道有「交數」呢個規矩啦，佢直言一票不能少，「風雨飄搖都無阻各位好友，行出嚟呼籲選民投票畀 #3號 #陳凱欣」，仲好窩心咁話，「天有不測風雲，落雨就急降溫，各位市民外出投票，都勿忘着多件衫，香港需要您！」
唔通怕陳凱欣若然當選，會令工聯會日後立法會插旗九西，更加冇可能？所以小強嘅潛意識，其實係想李卓人勝選，所以叫人投3號、即係李卓人？定係想立法會多返個工會背景嘅對手，知己知彼提升自己作戰力？當然啦，都有可能係手民之誤嘅……八方見佢個fb之後已改返「#5號 #陳凱欣」，唔知有幾多工聯會粉絲，欣‧此錯投李卓人呢？
李八方