噚日朝早9點幾，青山公路元朗段近YOHO MALL，有一架喺快線行緊嘅客貨車突然着火，36歲姓張司機即刻跳車保命。火勢越燒越勁，大量黑煙升到半空，仲傳出爆炸聲㖭。
附近揸車人士同樓上居民都見到當時情況，紛紛報警。消防員趕到現場救火，大約13分鐘之後將火救熄，好彩事件中冇人受傷，但係客貨車嘅車廂就燒到渣都冇嘞。
消防同警察喺現場調查，據了解，姓張司機當時揸車返工，向元朗方向行車，去到YOHO MALL對開嗰陣，佢突然覺得身後面㷫烚烚，仲有啲煙傳過嚟。佢即刻停車，然後就去車尾箱將兩部發電機抬出車擺落地下，發電機同客貨車好快已經起火，陷入火海。消防初步調查都係懷疑有一部發電機因為漏油而起火，火警冇可疑。