基斯坦奴朗拿度（C朗）又有新紀錄喇！上星期六意甲祖雲達斯主場對史帕爾，C朗28分鐘為球隊先開紀錄，帶領球隊以2:0擊敗對手，繼續保持意甲一哥地位。呢個入波已經係佢加盟祖記以嚟，各項賽事嘅第10個入球，仲成為球隊史上最快入到10球嘅球員，認真威水。
2:0破史軍首開紀錄
由於喺國際賽期冇為葡萄牙上陣，C朗今場叉足電上陣搏殺，而佢亦同左閘阿歷士辛度一樣13場意甲全勤。同時，為咗響應今個星期意甲嘅反暴力對待女性運動，C朗亦喺面上搽咗撻紅色，象徵向暴力出示紅牌。講番場波，比賽初段祖記雖然控制大局，不過就冇乜有威脅嘅射門。直至28分鐘，C朗接應比真歷開出嘅罰球喺門前掃把腳射入，幫祖記打開紀錄。
祖記27球過半關佢事
呢個入波，係C朗為祖雲達斯喺各項賽事攻入嘅第10球，只係用咗16場就達標，成為祖記史上最快入到10球嘅球員。對比過去幾位祖記大牌射手首季嘅表現，C朗亦係最快成功入球上雙。其中恩沙基就用咗18場先入到10球、希古恩用咗20場、查斯古特就29場、伊巴謙莫域仲要30場。另外，C朗喺意甲已入9球，係近50年嚟祖記首位只係踢咗13場聯賽就射入9球嘅球員，對上一個做到嘅已經係68/69球季嘅安拿達斯。
雖然加盟初期，C朗一度陷入入球荒，但佢隨即用入波嚟證明自己嘅能力。家陣祖記喺今季意甲攻入27球，當中C朗就貢獻咗9入球5助攻，即係隊波超過一半入波同佢有關，已經成為咗「斑馬軍團」不可或缺嘅一分子。賽後教練艾基利亦大讚C朗嘅表現，「佢就係一個大師，喺適當嘅時候向對手送出致命一擊。」
贏波之後，祖記意甲13戰12勝1和，以37分繼續獨領群雄。同日另一場，國際米蘭迎戰尾二嘅費辛隆尼，以3:0大勝對手，賽後得28分，落後榜首祖記九分。