求驗客手記：小保加隊巴遇襲　球員上病床

原定喺上星期六由阿根廷兩大死對頭，河床迎戰小保加嘅南美自由盃決賽次回合賽事，由於小保加嘅隊巴賽前俾河床球迷襲擊，原定喺當地時間下晝五點開波嘅比賽，曾一度推遲至夜晚七點半開波。不過南美足協之後宣佈，呢場自由盃決賽將會延期至當地時間星期日下晝五點先上演。

小保加隊巴係喺前往河床球場途中遇到襲擊，河床球迷向小保加隊巴投擲石頭、雜物同埋噴胡椒噴霧等，仲打爛玻璃窗，隊巴上有球員受傷同唔舒服，而隊長柏保路佩雷斯仲因隻眼受傷要入院。有報道話，小保加有多名球員臉部、手臂有唔同傷勢，仲有部份球員抵達球場後喺更衣室嘔。小保加球會秘書長話：「球員都受咗傷，唔會喺咁樣情況下比賽。」兩隊喺本月11日嘅首回合賽事踢成2:2平手。