韓國男團頻頻來港搵真銀，前晚香港亞博館更非常熱鬧，分別有出道20年的元祖男團神話以及出道四年的WINNER開騷，於同會場內大鬥人氣。到昨午就輪到另一男團VIXX的成員Ravi單拖襲港到觀塘出席活動，港迷認真分身不暇。
Sandara撐WINNER
神話前晚假亞博館Hall 8 & 10開騷，唱足三個多小時。六位成員Eric、李玟雨、金烔完、申彗星、JunJin及Andy穿上紅色西裝現身，當中金烔完更穿上背心騷肌。神話在現場大講廣東話：「好掛住你哋」及「唔該」冧港迷。剛過39歲（韓國年齡40歲）生日的金烔完搞笑用英文表示：「我終於40歲啦，我很傷心。」之後賣口乖表示因為有粉絲，所以十分幸福。安哥時，成員戴上動物公仔帽賣萌，引來粉絲不停尖叫。
至於前晚首度在港開騷的WINNER則在亞博館Arena會港迷，日前秘密襲港的同門師姐、女團2NE1前成員Sandara也有在台下支持師弟。成員除演繹團體歌曲外，各自準備solo舞台，宋旻浩大晒肌肉、金秦禹及李昇勳分別唱師兄團BIGBANG成員G-DRAGON及太陽的歌，姜昇潤更清唱周杰倫的《不能說的秘密》。
Ravi恨與G.E.M合作
另外，Ravi昨日撇甩VIXX的隊友單拖出席活動，吸引近500粉絲撐場。Ravi自爆想去食點心、蛋撻及購物，之後跟粉絲玩遊戲，大派福利，包括十指緊扣、對望。他受訪時坦言想與G.E.M合作，又自言很想再在香港開騷。
採訪：梁展雯、文凱靈
攝影：沈健程、仇志德
