【捍衞粵語】
教育局局長楊潤雄上月又點火頭，質疑香港應否繼續以粵語教授中文。醉心粵語研究的拔萃男書院前老師黃樹堅忿忿不平，直言輕視粵語乃係「死路一條」，長遠將導致廣東話滅亡！時事評論員呂秉權對此亦深表關注，恰巧呂氏為黃老師昔日門生，我們於是安排一次師生對談，由粵語趣談講到廣東話傳承危機，期望大眾引起關注。
拔萃年代的呂秉權出名反斗調皮，又活躍於學界辯論，是典型男校風頭躉。任教中文多年的黃老師則一派讀書人模樣，舉止溫文謙遜，說話輕聲細語，與面前門生可謂兩個極端。記者有幸跟呂氏做過同窗，當年此君曾經言之鑿鑿，說其花名「呂Bell」的「Bell」真有其字，寫法為「宀」加「B-E-L-L」云云，博得同學仔捧腹。回想起來，這笑點比《新紮師妹》的「方鍾Sir」還早了十年。
聖賢古語變奏 孟子也「求其」
難得今次跟老師對談，他劈頭就拿《新》片開玩笑：「老師，方鍾Sir個『Sir』字其實有冇得寫？」大概見慣這傢伙的小丑把戲，黃老師不慌不忙說：「如果英文嗰個『Sir』梗係無關啦，但如果你要寫『Sir』滑梯個『Sir』呢，應該用呢個……」說罷隨即寫在拍紙簿了一個「瀡」字：「根據宋朝《集韻》呢本書，佢嘅解法就係『滑也』。」有趣的是，原來《新紮師妹》的「紮」古文亦有正寫——黃老師的著作《粵語古趣談三編》提到，「紮」本字應為「茁」，《廣韻》和《集韻》均有記載。其義則是「草初生出地皃」，可見符合「新紮」一詞嶄露頭角之意。
大家作為廣東人，相信都有呂秉權心目中的疑問：「廣東話有好多字我哋會用，好似『求求其其』呀，『乜乜物物』呀……呢啲係咪得個講字，定係寫得到、有源流搵得返？」聽黃老師解說，你會發現早見於古文的粵語詞其實遠比大家想像中多，「唔少『口』字邊嘅字係有本來一個正確寫法。」例如「不」（唔）、「來」（嚟）、「爾」（「呢個」的「呢」字），統統有古字可用。就連「求其」兩個字原來都有出處，「我認為啦，『求其』呢係出自孟子嘅：『學問之道無他，求其放心而已矣』。」據老師講，修辭學有所謂『藏詞』的手法，現今我們口語說「求其」實則是藏了「放心」兩個字。當然，孟子講的「放心」和我們說的「求其」意思上有少許差異，相信是粵人借用聖賢古語的變奏。老師又舉了下面幾個粵語字例，不但有根有據，而且由來相當過癮。
無知，也許是文化傳承最大障礙。有主張普教中的所謂專家強調，粵語只是一派「方言」，甚至普羅大眾亦妄自菲薄，以為廣東話難登大雅之堂。看在黃老師眼裏，這一切實在是無知所害，「好多人以為普通話嘅詞一定文雅過粵語，其實啱啱相反。我哋寫語體文唔可以用粵語去寫，並唔係因為我哋『俗』，而係因為我哋雅得滯。」他的理據簡單易明，「漢族人通常都認為越古就越雅嘅，係咪先？所以有『古雅』呢個詞語吖嘛。偏偏粵語裏面就有好多文言詞喺度，所以咪『雅得滯』，唔寫得落語體文囉。」
「生仔」好文雅 宋朝已「好嘢」
黃老師給呂秉權舉了個例：「譬如『生仔』，講個『仔』字都有人以為俗嗰喎。但係『生仔』我哋講咗三千幾年喇。」原來「生仔」一詞早在甲骨文經已出現，老師查閱馬如森編撰的《新版殷墟甲骨文實用字典》，證實當中有記載「仔」字，而且用法與「子」相通。該書作者舉出的應用例子，正正有「生仔」兩個字。「而『生小孩』個『孩』字，甲骨文係冇嘅。咁『生小孩』點解會文雅得過『生仔』呢？」曾長駐內地當新聞記者的呂秉權亦不忘補白：「北方話，或者我哋寫文章，有時講『生仔』就寫『生產』，似乎仲有啲歧義，好似工廠生產咁，唔人性化。」
令筆者深感孤陋寡聞的，是一句簡單不過的廣東話：「好嘢」。若不是老師指點，還不知道三歲小朋友都會講的歡呼，原來也有出處：「『好嘢』個『嘢』字其實即係「也」字，之乎者也個也字。」宋朝《廣韻》有修錄「也」，當中列舉的同音字則包括「野」。元曲《同樂院燕青博魚》第三折便有如此一段對白：「好也！好也！如今都綁下在死囚牢裏去了。看你可有本事再來殺我。」而把「也」字的讀音念成「野」，相信則是語言久經年月的變化所至。
聽過一輪語言考古，呂秉權不禁要問：「粵語有咁多好嘅字，但係你寫落去老師又會改咗你，點解始終入唔到文？」本身教過幾十年中文，黃老師自然理解當中原委，「我哋又唔好怪老師。寫語體文係要畀全世界嘅漢族人睇。你寫粵語詞落去，唔識粵語係睇唔明嘅。但係咁唔代表我哋啲詞係唔見得人。」之不過歸根究柢，如今許多人貶粵語而褒語體文，這種偏見最初從何而來？
粵語被貶 雅俗偏見而來?
呂秉權再追問：「既然粵語咁古雅，咁點解我哋香港人成日有個錯覺，覺得粵語係好通俗甚至係粗俗，難登大雅之堂？」對此，黃老師認為大家要先了解語體文的發展背景，「大家諗返吓，胡適、陳獨秀當年點解要搞白話文運動呀？因為佢哋唔鍾意文言文吖嘛。文言文距離佢哋嘅口語太遠呀。」胡、陳二人操北方話，眼見同鄉因為文言文艱澀以致讀書寫字都有困難，難免憂心。「佢哋認為，點解唔可以我把口咁講就咁寫出嚟啫，容易好多吖嘛。但係要留意，佢哋從來冇話過文言文係『俗』嘅。」可惜現代人不明所以，以為語體不用粵詞就等於粵語通俗，學校老師又鮮有跟學生研究粵詞發音，久而久之便形成偏見。
例：阿㔹（阿叻）
㔹，東漢《說文解字》早有記載，意為「才十人也」。黃老師：「即係話才能係十倍於常人，咁就係『㔹』喇。」 呂秉權亂入：「你睇返今時今日，『叻』字變成『口、力』，得把口，好似我咁樣，哈哈。」在記者看來，當今得把口的「㔹人」非廢老代表「荷蘭叻」莫屬。
例：阿懋整餅
黃老師：「『懋』，其實就係『阿茂阿壽』嗰個阿茂嘅本字。」根據遼朝的字書《龍龕手鏡》，此字解作「愚痴貌也」。呂秉權亂入：「咁點解『阿懋』一定要配阿壽，好似啲英文課本Peter一定要配Mary？」黃老師：「你睇上海話都仲有用『阿壽』嘅，意思即係話人哋土頭土腦，唔識人情世故。咁同我哋『阿懋』係咪好相襯呀？」
例：靚到丼一聲
據黃老師講，1,800多年前《說文解字》已經出現「丼」，即篆文的「井」字，中間那一「點」代表取井水用的甕缸。到隸書時期「點」被省略，成為如今大家慣用的「井」。後來宋人把古字「丼」另作別解：據《集韻》記載，「丼」讀成「抌」（dam2），就是「投物井中聲」的意思。那麼「丼」字怎麼會扯到「靚到丼一聲」呢？老師認為可能跟「沉魚落雁」這成語有關──水中魚兒看到美人不禁自慚形穢，「丼一聲」潛水去也。
例：跐屎
字早在戰國時代《莊子》．《秋水》已有記載：「且彼方跐黃泉而登大皇」，意思就是「踏」。此字古音讀「zaai2」，即「寨」的陰上讀法；不過據黃老師考究，「z-」有不少轉讀「j-」的例子，故後人將「跐」讀成「jaai2」亦不足為奇。
採訪：張育嘉
攝影：吳煒豪