一向新聞多多嘅皇家馬德里後衞沙治奧拉莫斯又出事。德國《明鏡》周刊上星期五爆料，指拉莫斯喺2016/17球季嘅歐聯決賽賽後未能通過藥檢，而網站「足球解密」亦都爆出拉莫斯至少兩次冇按照慣常做法接受藥檢，搞到皇馬同歐洲足協要急急發聲明澄清。
據報道，拉莫斯喺2017年皇馬4:1擊敗祖雲達斯嘅歐聯決賽賽後進行嘅藥檢，所呈交嘅樣本含有世界反禁藥組織（WADA）禁止使用物質地塞米松（Dexamethasone，簡稱DXMS）殘餘物，呢個係一種主治發炎嘅類固醇，不過WADA列明只有當使用者喺冇清楚申報之下先至算係犯禁，當局最後冇採取任何行動。
拉莫斯沖完涼先藥檢
報道亦有提到，拉莫斯、皇馬同歐洲足協三方喺前屆嘅歐聯決賽後持續溝通，當中一名「醫生A」嘅隊醫亦都承認，自己喺報告入面漏填拉莫斯曾經喺比賽前注射兩劑DXMS，以抑制膊頭同膝頭發炎症狀嘅相關資料。
歐洲足協證清白
另一方面，足球解密又提到，喺今年四月皇馬對馬拉加嘅聯賽之後，一名反禁藥官員曾經上報指拉莫斯冇按慣常做法，喺比賽後馬上接受藥檢，堅持要先去沖涼，事件最後同樣不了了之。
皇馬上星期五就發表嘅聲明回應有關報道，指球隊喺上年歐聯決賽之後向有關當局遞交補充資料，經WADA同歐洲足協等相關部門核實之後，事情已經告一段落。皇馬強調拉莫斯從未違反任何禁藥條例，又指《明鏡》周刊嘅報道「軟弱無力」。歐洲足協亦都就報道作出回應，證實WADA總監早前已經去信歐洲足協，證明拉莫斯冇違反任何禁藥條例，表示拉莫斯所參與嘅藥檢都喺合乎相關程序之下進行。
雖然禁藥事件似乎就告一段落，不過唔知道拉莫斯係咪受到呢單新聞嘅影響變咗「慌失失奇兵」。拉莫斯上星期六雖然有份幫皇馬正選上陣作客伊巴，不過就俾伊巴贈三蛋，最終以0:3大敗，其中兩球拉莫斯同佢嘅中堅拍檔華拉尼都要負上好大責任㖭，睇嚟拉莫斯今季真係諸事不順喎。