上星期六日職上演一場超長激戰，清水心跳主場迎戰神戶勝利船（藍衫），球證喺下半場畀咗長達近20分鐘嘅補時，一直落後嘅心跳喺補時第14分鐘由門將六反勇治（小圖）頂入扳平3:3，亦係繼22年前浦和紅鑽門將田北雄氣之後，日本頂級聯賽史上僅第二位可以入到波嘅門將。場波火藥味濃，到下半場尾段勝利船先有藤田直之被逐，當時落後緊1:3嘅心跳喺4分鐘後由戴恩費斯杜格拉斯建功追成2:3。之後不斷有球員受傷倒地嘅情況出現，原本示意得四分鐘嘅補時，球證都認為唔夠用畀場波繼續進行，直到補時第14分鐘心跳有角球，棄關出擊嘅門將六反勇治接應頂入追平3:3。之後勝利船再有威靈頓路爾斯領紅，引發兩邊職球員衝突，普多斯基都加入戰團推撞，另一外援西班牙中場恩尼斯達就比較理性去勸交。勝利船由贏變和，但拎一分都意義重大，確定成功護級。至於同日比賽柏雷素爾雖然贏波但都冇用，一樣確定直接降班。