趣趣地：毛孩神救撲出12碼

早前澳門大賽車就有隻「毛孩」喺鬥緊F3嗰陣衝入賽道，最近一場坊間嘅足球賽亦出現同樣情況，當時去到互射12碼階段，黑衫一隊球員上前主射，對方門將已捉錯路，諗住入硬之際，忽然就殺出隻臘腸狗喺門前「救波」（圖）。換個角度睇，其實狗狗喺黑衫球員助跑個陣，已經喺龍門側邊遊走，看似伺機「救波」，結果球員起腳，佢就用自己修長嘅狗身撲出射門，真係世界級門將嘅表現。