就喺中美貿易戰打到如火如荼之際，美國航母列根號就大搖大擺駛入香港，呢個畫面真係相當有趣。不過咁都未算，有啲更有趣嘅畫面㗎，話說列根號都唔係第一次訪港，按傳統美軍會喺航母掛美國國旗同埋東道主嘅旗，以往佢哋都掛中國國旗嘅，大家又估吓今年佢哋掛乜旗？
是咁的，列根號都唔係第一次嚟香港㗎喇，佢哋喺2011年同埋2014年都嚟過，嗰陣時佢哋嚟到，都係一邊掛美國國旗，另一邊掛中國國旗。但喺事隔4年，今次佢哋再嚟香港居然換咗支特區區旗上去，同美國國旗平起平坐。大家話喇，掛開國旗就變咗區旗，有乜含意先？其實呢吓高章之處，在於掛區旗都無政治不正確，唔通想話區旗不被承認呀？