全球股災蔓延至英超球會曼聯！話說喺美國紐約股票交易所上市嘅紅魔鬼，禮拜二錄得自2017年10月後單日最大跌幅，球會市值蒸發咗30億港元！不過外媒就話格拉沙家族唔擔心今次股價急瀉，認為同近月整體市場下跌嘅走勢脗合，仲話同期Netflix嘅股價跌咗19.7%，曼聯過去一個月跌咗14.5%唔算高喎！
不過曼聯市值突然插水，唔知會唔會影響到球隊冬窗嘅收購計劃，事關領隊摩連奴一直嘈住要買人，上個禮拜仲走去睇比利時對冰島場波，考察韋素同艾達韋列特，又有傳曼聯會喺一月出手買費倫天拿後衞尼高拉米連高域，𠵱家同緊陣中主力中堅基斯史摩寧傾續約，但後者就開大口索12萬鎊周薪囉。咁多嘢煩嘅摩帥，禮拜三就返咗曼市以一身黑色嘅運動裝出街食晚飯，雖然低調地戴帽笠住個頭行，但都畀乞丏認出乞錢，果然出色嘅男人無論喺邊個地方，都好似漆黑中嘅螢火蟲一樣咁鮮明喇。