前排美國國會先出咗份報告，建議檢視吓美國對香港嘅軍用、民用技術出口管制政策，嚇到自由黨急急腳抽起有關《基本法》23條立法嘅議案，不過「好打得」嘅特首林鄭月娥（圖）仲好口硬，話人哋份報告指控失實、雙重標準同埋係戴咗有色眼鏡。過咗冇幾耐箒，原來林鄭又靜雞雞去咗同香港美國商會食飯。
話說噚日香港美國商會有個感恩節午餐會，盛傳林鄭都去，於是八方就去八吓啦。點知去到先發現，根本林鄭冇去到，只係有幾位問責局長，例如創科局長楊偉雄、財庫局長劉怡翔等現身。
但係八方依然死心不息，無理由無啦啦傳出林鄭出席美國商會午宴嘅，於是問吓特首辦。點知特首辦確認，林鄭前日已出席美國商會嘅感恩節午膳，所以噚日冇再現身。咁到底林鄭閉門同美國商會講啲乜？特首辦就話由於係閉門活動，唔可以透露談話內容喎。