邊個話香港人冷漠？其實有事睇唔過眼都會企出嚟㗎，好似深水埗呢位哥仔咁，因為唔抵得客貨車司機唔講道理，指罵被撞嘅的士司機，竟然出拳出助，係就係見義勇為，但打人始終唔啱。
私家車不顧而去
讀者Thomas目擊，周二（20日）下午5點幾，一架的士沿深水埗汝州街方向行駛，去到石硤尾街附近，被一架私家車撞到，不顧而去。的士司機即刻落車檢查，發現右邊尾門有輕微凹陷，呢個時候一架客貨車駛到，司機落車不斷大罵的士司機，話佢阻住條路，仲想打人咁款。一名圍觀男途人上前阻止，但客貨車司機未有理會，兩人仲大打出手，扭作一團。的士司機見到兩個人為咗自己打起上嚟，即刻勸交，一臉無奈。最終，圍觀嘅幾名南亞漢都加入勸交，隔開兩個人。
警方表示當日下午5點41分，姓溫（55歲）司機駕駛的士沿汝州街右三線往欽州街方向行駛，其間轉入石硤尾街，遭白色私家車撞到，私家車司機着的士司機駛到一旁，之後絕塵而去，警方列交通意外無人受傷事件處理。至於打人嗰兩位阿哥，喺警方到場前已經離開。