李偲嫣（圖）兩年前以自己有份創立嘅正義聯盟名義，參選立法會但落敗，早前被廉署起訴涉嫌喺選舉中舞弊，案件今個月23號會再提訊。殺到嚟點算好呢？出銀彈政策啦！八方八到，佢請咗金牙大狀資深大律師清洪幫佢打呢單官司，哇，之前搵落嘅，睇怕都冇一大截，肉痛死囉。
老廉話阿偲嫣收咗合共2.3萬元不知名或地址不明嘅捐款後，冇確保呢啲捐款唔會用嚟做選舉開支，同埋冇按規定將呢啲捐贈交畀慈善機構。八方了解過個指控，發現9項呢類超過1,000蚊捐贈中，其中一筆2,000蚊係嚟自叫「冼澤正」嘅人。個名咁特別，同名同姓嘅冇幾多個，睇番資料，曾經拍住偲嫣，喺撐警同反佔中合作無間嘅退休高級督察兼「愛護香港力量」成員，又係叫冼澤正。陳生，又係你呀？