區議會選舉下年年底即將舉行，各大政黨亦忙於進行部署。現時喺港島區有五個區議會議席嘅自由黨預計會進行大洗牌，身兼立法會批發及零售界議員嘅東區區議員邵家輝，同資深南區區議員馮仕耕下屆預計唔會競逐連任，改由兩個新人上場，不過民主派兩區暫時都唔考慮派人出選，喺冇對手下兩個自由黨新人，極有可能無風無險自動當選。
楊哲安成最大希望
據了解，自由黨2019年區選將維持喺港島區派出七至八人參選，早前贏出中西區山頂補選嘅楊哲安、2015年勝選嘅渣甸山區議員林偉文、同東區翠德區議員李鎮強均考慮競逐連任，上屆曾經參選東區丹拿但落敗的曾卓兒亦會再接再厲，而曾經出戰中西區衛城嘅吳龍飛就專心炒樓唔再挑戰，衛城選區下屆會換上勤力富二代馮家亮。至於同樣2007年開始出任區議員嘅邵家輝和馮仕耕，前者就因為當選立法會議員之後，難以兼顧地區工作，後者就因為轉行搵真銀，都考慮唔再連任。
不過，自由黨梗係唔會將議席拱手讓人喇，據知，自由黨已經安排資深黨員阮建中接手邵家輝寶馬山選區，而新人梁俊就會上陣南區海灣選區，兩個新人𠵱家已經開始落區服務，鞏固實力。雖然只係派出不足10人參選，但自由黨喺港島區區選嘅選情仍然不容忽視，事關佢哋若然順利保留原有議席，甚至爭取多1至2席，相信可以有更大牙力向西環爭取，喺2020年立法會選舉派出楊哲安出戰港島直選，成為上屆直選一席不保嘅自由黨嘅重要希望。
李八方