「握扶手，企定定」呢句宣傳口號成日聽到，大家好多時唔為意，一唔留神隨時出意外。黃大仙竹園邨噚日下晝就發生扶手電梯意外，一個88歲婆婆搭扶手電梯時，懷疑差錯腳失平衡，碌咗落下一層，仲撼穿個頭，流成一地都係血，動彈不得。商場保安員即刻撳停扶手電梯，有熱心途人即刻上去用紙巾幫婆婆止血。
發生意外嘅地方係黃大仙竹園道15號竹園廣場，噚日下晝4點幾，88歲姓何嘅婆婆喺商場1樓準備乘搭扶手電梯，落去位於地下嘅街市。何婆婆搭扶手電梯時，一隻手拎住枴杖，另一隻手又拉住買餸車，搞到兩隻手都唔得閒，懷疑因為咁樣差錯腳失平衡，成個人向前仆，導致撼穿個頭，仲整傷眼角。
途人安慰 幫手止血
何婆婆跌倒之後瞓喺扶手電梯口，雖然仍然有知覺，但就未能動彈。何婆婆頭部位置不停流血，染滿電梯口一角落，場面嚇人。有一個熱心男途人見到咁嘅情況，就行埋去何婆婆身邊，用紙巾幫佢止住血先，又出言安慰何婆婆。
讀者麥小姐事發時途經上址，當時何婆婆已經跌倒地上，佢話意外後何婆婆嘅枴杖同埋買餸車散落現場，何婆婆就滿面鮮血，冇乜反應，「好多人圍住個婆婆，又有人畀紙巾佢止血先，雖然佢郁唔到，但都有知覺」。
意外後，多個商場保安趕到現場控制人群，又阻止其他人經過，一個54歲姓鄧女途人報警。救護員到場替何婆婆包紮頭部，送去伊利沙伯醫院治理時，婆婆仲係清醒嘅。警方同時亦封鎖扶手電梯上落方向，又翻睇商場閉路電視片段，追查事發原因，初步相信事件無可疑。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。