新民黨容海恩好快就做媽媽，之前佢提議過想立法會加育嬰設施，仲有容許懷孕議員放產假期間，可以投授權票。要加育嬰設施呢個易搞，但要開先例畀佢可以授權其他議員代佢投票，噚日就畀立法會議事規則委員會Ban咗。
謝偉俊：唔會再研究
議事規則委員會噚日開會，委員會主席謝偉俊會後話，大家傾咗容海恩要求懷孕議員可以有授權票建議，但委員會討論過後認為，香港其實地方唔大，而且考慮埋其他國家做法，認為𠵱家暫時毋須畀議員可以有授權票，亦唔會再研究。
梁繼昌話，授權票呢樣嘢同立法會議事規則、基本法規定有出入，而且好有爭議性，唔適合為此修改議事規則，否則日後議員有小意外可以缺席投票、屋企有紅白二事又可以要求缺席投票，相信呢個唔係市民想見到嘅議會安排。