喺巴布亞新幾內亞出席完亞太經合組織領導人非正式會議後，特首林鄭離開前見傳媒，有記者好唔識趣，問娥特點睇國家主席習近平連續兩年都唔喺（APEC）𥧌會期間同佢見面？娥特不以為意，繼續展示好勝笑容，力數一個月內見咗習大大4次嘞喎，而且呢唔一定要利用國際場合先可以同習大大溝通。咁又係，上次港珠澳大橋嘅與習同行已經贏晒，其他細節又點會介懷？
北上述職有得見
只能怪大家唔識嘢啦……相信林鄭係咁諗囉。林鄭話喎，「如果你數返轉頭嘅話，我喺一個月內，由（習）主席喺珠海為我哋主持港珠澳大橋開通以來，我哋已經見咗4次，包括喺上海（博覽會）」，而且仲有唔到一個月佢就去北京述職，講到自己唔會在意呢次冇得見囉。
至於中美貿易戰之下，港美關係更見緊張，林鄭就話唔願意見到任何貿易戰或貿易糾紛，至於香港政府呢，則會視乎情況發展，定期同各大商會聯絡，如果知道香港業界、特別係中小企有困難，一定提供適當支持。咦，娥特今次冇再用嚴詞責怪美方抹黑喎，唔知係咪收到新指示呢？