九西補選進入大直路，候選人都埋牙肉搏，而喺全面缺席地區團體舉辦嘅論壇之時，獲建制派支持出選嘅陳凱欣（圖）都好畀面，出席晒各大電子傳媒舉辦嘅論壇，可能話晒以前都係傳媒人，都會多一份親切感。但，咪住，去到今日，竟然首度缺席電子傳媒舉辦嘅選舉論壇，因乜事佢唔喺呢個節目亮相？睇返吖，原來係港台英文台第三台Backchat嘅特備節目，同之前嘅論壇唯一之別，除咗講英文，好似冇。
根據港台發出嘅採訪通知，今早8點半至9點半嘅節目，除咗陳凱欣，其餘4名候選人包括「劏房阿哥」伍廸希、工黨李卓人、前民協馮檢基以及曾麗文，個個都會現身，親自以英文辯出火花。港台喺採訪通知冇講明，點解陳凱欣唔嚟；陳凱欣助選團回應八方話，因為陳凱欣行程緊密及已安排競選活動，所以未能出席有關論壇喎。