特首林鄭曾經講過，「攞特首出氣係冇問題，特首係可以俾人鬧」，估唔到有市民真係信佢咁講。噚日就有人走去金鐘特首辦公室，用噴漆喺外牆噴咗15隻字鬧特首洩憤。結果係點？梗係唔係冇問題啦，警員拉咗一男子，涉嫌刑事毀壞帶署調查。
噚日晏晝12點幾，一男子喺金鐘添華道1號嘅特首辦外牆，用白色噴漆噴上「郑月娥包庇凶犯 葵涌医院伤天害理」嘅簡體字字句。現場職員發現，即刻將涉案男子截停，報警處理。警員到場拉咗個85歲姓黃嘅阿伯，調查緊佢犯案嘅動機。之後職員搵清潔工嚟清理，約20分鐘後清理完畢。八方就事件問過特首辦，但特首辦就話唔回應。林鄭曾經話過自己同藝人劉德華一樣受到「網絡欺凌」，唔知今次事件佢又覺唔覺得受欺凌呢？