元朗同樂街一個路口噚日朝早發生交通意外，一個阿伯懷疑亂過馬路，咁啱一架貨車轉彎駛至，司機見到阿伯即刻扭軚急煞停車，阿伯被嚇親，失平衡撞向貨車左邊車身，跌低撼親個頭流血，有途人見到情況即上前安慰阿伯。
險捱貨車撞 失重心跌低
受傷嘅75歲阿伯姓顏，佢清醒送院治理；48歲姓袁貨車司機意外後留喺現場協助警方調查。事發噚日朝早大約10點半，袁揸住一部運送凍肉海產嘅貨車，沿元朗安寧路左轉同樂街，點知一轉彎見到顏伯過緊馬路，佢即刻扭軚向右避開顏伯，臨停定時顏伯懷疑嚇親失神，撞咗落貨車左邊車身。
顏伯跟住跌咗落地撼親個頭流血，讀者許先生話，有個熱心男即刻上去安慰佢，等佢冇咁驚。許先生話：「現場隔籬有紅綠燈，朝早警察喺度捉人亂過馬路，但阿伯仍然咁做，貨車一轉彎可能有盲點，揸枴杖阿伯過馬路，貨車就撞倒阿伯喇！」