台灣九合一選舉周六（24日）舉行，過去不論泛民同建制嘅政界人士都專程赴台觀戰取經，但今年建制派觀選意欲冇乜，有建制派同八方講中聯辦已向佢哋發出「硬命令」，唔希望佢哋去台灣觀選，更有人講到西環直情想佢哋「連台灣都唔好去」！
每次台灣大選，本港政團都會透過陸委會安排到台灣觀戰，一來感受選舉氣氛，二來參考吓台灣選舉制度下，候選人點樣宣傳同拉票。好似2016年台灣大選，民主動力、新思維等政團組團觀選，現任議員民建聯陳恒鑌同資深建制派工聯會陳婉嫻都有去觀摩。但八方打聽過，呢次冇乜建制派赴台，事關西環已發硬指令，要求建制派唔好去台灣，消息話唔只現役建制議員，退下火線嘅「頭面人物」亦不獲放行，只有部份建制出身嘅學者獲豁免。消息指西環冇明言原因，但相信因為近日台海關係緊張所致，亦冇講明「永久禁止」定「一次性」！